ХӨВСГӨЛ АЙМГИЙН ҮНЭ ЧАНАРЫН ХЭЛТСИЙН ДАРГА ЧОЙНДОНГИЙН ДАВААНЯМ
Хөвсгөл аймгийн Тариалан сумын нутаг Ваандай хэмээх газар 1947 оны 12 дугаар сарын 12-ны өдөр малчин ард Чойндонгийн гэр бүлд төрсөн. Бага насаа эцэг эхийн гар дээр өнгөрүүлж 1956 онд Тариалан сумын Алтангадас нэгдлийн бага сургуульд элсэн орж суралцан дөрөвдүгээр ангидаа Тариалан сумын 10 жилийн дунд сургуульд шилжин суралцаж 1966 онд ерөнхий боловсролын сургуулийг төгссөн байна. 1987-1972 онуудад ЗХУ-ын Москва хотын Хүнсний үйлдвэрийн технологийн дээд сургуульд суралцан Цардуул, сахарын машин аппаратын инженер механикч мэргэжлээр төгссөн байна. 1972 оноос Сэлэнгэ аймгийн Зүүнхараа дахь Спирт заводод засварын механикчаар ажлын гараагаа эхэлж 1974 он хүртэл тус үйлдвэрийн Ерөнхий механикаар ажиллаж байгаад тэр үед Зүүнхараа хотод БНХАУ-ын тусламжаар баригдаж байгаад зогссон спирт, бал бурмын үйлдвэрийг Монголын тал хүлээн авч барилга байгууламж, тоног төхөөрөмжийн угсралтыг өөрсдийн мэргэжилтнүүдийн хүчээр дуусгах болж Ашиглалтын түр захиргаа байгуулагдахад монтажийн инженерээр томилогдон ажиллаж уг үйлдвэрийг 1974 оны намар туршилтын замаар анхлан ажиллуулахад ихээхэн үүрэг гүйцэтгэсэн байна. Тус үйлдвэрт Нэгдсэн засварын цехийн даргаар ажиллаж байгаад 1976 онд Хөнгөн ба Хүнсний үйлдвэрийн яамны шийдвэрээр Хөвсгөл аймгийн Хүнсний үйлдвэрийн даргаар томилогдон ажилласан байна.
Ч.Давааням аймгийн Намын хороо, АДХГ Захиргаа, ҮСУХорооны шийдвэрээр 1984 оноос Хөвсгөл аймгийн АДХГЗ-ны Үнэ, чанарын хэлтсийн даргаар томилогдон ажиллаж аймгийн аж үйлдвэр, хөдөө аж ахуйн бүтээгдэхүүний чанарыг сайжруулан тэр үед байсан 3 дугаар ангийн бүтээгдэхүүний эзлэх хувийн жинг бууруулах, алтан медальтай буюу 1дүгээр ангийн бүтээгдэхүүний хувь хэмжээг нэмэгдүүлэхэд чиглэгдсэн арга хэмжээг идэвхтэй зохион байгуулж тодорхой үр дүнд хүрч байсан бөгөөд Хөвсгөл аймгийн Үнэ, чанарын хэлтэс нь БНМАУ-ын Үнэ, стандартын хорооны системийн байгууллагуудын тэргүүний хэлтсийн хэмжээнд ажиллаж удирдах дээд байгууллагынхаа шагналыг олон удаа хүртэж байсан байна.
Ч.Давааням нь 1999 оноос Стандартчиллын төв байгууллагад шилжин ажилласан ба Үндэсний стандартчиллын эрдэм шинжилгээний хүрээлэнгийн орлогч дарга, Стандартчиллын Шинжлэх ухаан технологийн Зөвлөлийн орлогч дарга, Стандартчиллын улсын ахлах байцаагч зэрэг ажлыг 2001 он хүртэл хийж байгаад ар гэрийн байдлаас /гэр бүлийн хүн нь хүний их эмч бөгөөд аймгийн Эрүүлийг хамгаалах газарт удирдах ажил хийж байсан, орон нутагт эмч дутагдалтай зэрэг шалтгааны улмаас шилжүүлэхгүй гэсэн учраас/ Хөвсгөл аймгийн АДХГЗ-ны аппарадад шилжин ажиллаж Аймгийн АДХГЗ-ны даргын Эрүүл мэнд, соёл боловсрол, биеийн тамир спорт хариуцсан референт, Мөрөн хотын АДХГ Захиргааны дарга, аймгийн Стандартчилал, хэмжилзүйн төвийн захирал зэрэг ажлыг хийж байгаад 2005 онд дээд байгууллагын шийдвэрээр Стандартчилал, хэмжилзүйн төв байгууллагад шилжин ажиллаж, Стандартчилал, баталгаажуулалтын газар, хэлтсийн дарга, тамгын газрын дарга, Стандартчилал хэмжил зүйн үндэсний Зөвлөлийн нарийн бичгийн дарга, стандартын улсын байцаагч, Боловсрол хөдөө аж ахуй, аюулгүй байдал, тээвэр, худалдаа, нийтийн хоол, үйлчилгээ, соёл, спортын салбаруудын стандартчиллын техникийн хорооны нарийн бичгийн дарга, Үйлчилгээ, аж ахуйн менежер зэрэг алба хааж байгаад 2009 онд өндөр насны тэтгэвэртээ гарсан байна.
Ч.Давааням нь Стандартчилал, хэмжил зүйн байгууллагад ажиллаж байхдаа боловсролын салбарын стандарчиллын ажлыг шинэчлэн эхлүүлж Ерөнхий боловсрол, мэргэжил тус бүрийн дээд боловсрол, мэргэжлийн боловсролын стандартчиллын суурь болон загвар стандартуудыг боловсруулалцан батлуулсан бөгөөд тэдгээр нь өнөөдрийг хүртэл мөрдөгдөж, стандартчиллын ажил үргэлжилсээр байна.
Мөн улсын хэмжээнд үйлчилгээний салбарыг стандартчилах ажлыг анх эхлүүлэн худалдаа, нийтийн хоол, аялал, жуулчлал, нийтийн тээвэр, мод модон материалын, малын гаралтай түүхий эдийн гэх мэт захын худалдаа, үсчин гоо сайхан, вар, халуун ус, барьцаалан зээлдүүлэх үйлчилгээ, галын аюулгүй байдал, мал эмнэлгийн эмчилгээ, оношилгооны хэд хэдэн стандартуудыг боловсруулан батлуулах ажлыг зохион байгуулж заримыг нь өөрөө гардан хийсэн байна.
Ч.Давааням ажлын амжилтыг үнэлэн төр, засгаас 60, 70, 80 жилийн ойн медалиуд, Их Монгол улс байгуулагдсаны 800 жилийн ойн медаль, Хөдөлмөрийн хүндэт медаль, Аймаг хотын хүндэт тэмдэг, медаль, Монгол улсын Боловсролын тэргүүний ажилтан, Хүнс, хөдөө аж ахуйн тэргүүний ажилтан, Стандартчилал, хэмжилзүйн тэргүүний ажилтан цол зэрэг шагналуудаар шагнагдсан байна. Ч.Давааням нь ажиллаж байсан салбартаа залуу үеийг тухайн ажил мэргэжилд нь сургах, дадлагжуулахад өөрийн мэдлэг ур ухаанаа харамгүй гаргаж тусалж байсан бөгөөд түүнийг нь үнэлж МХЗЭ-ийн Төв хорооны Залуу үеийг халамжлан хүмүүжүүлэгч тэргүүний ажилтан цол тэмдгээр шагнасан байна.