Та бүхэндээ XVII дугаар жарны "Хилэнт эх" хэмээх модон Луу жилийн сар шинийн мэндийг өргөн дэвшүүлье!
Улиран одож буй XVII дугаар жарны “Үзэсгэлэн болгогч” хэмээх усан Туулай жил 2023 онд Стандарт, хэмжил зүйн байгууллагын нэгэн зууныг бүтээсэн 100 жилийн ой тохиож, анх 1923 онд “Жин хэмжүүрийн товчоо” нэртэйгээр 3 хүний бүрэлдэхүүнтэйгээр байгуулагдаж байсан бол өдгөө 10 нэгж, дэргэдэх нэг байгууллага, 21 аймгийн салбар хэлтсүүдтэй, нийт 720 гаруй ажилтан, албан хаагчтайгаар өргөжин тэлсэн Засгийн газрын тохируулагч агентлаг болжээ.
Монгол Улсын Засгийн газар болон Монгол Улсын Шадар сайд С.Амарсайхан Стандарт, хэмжил зүйн салбарт онцгой анхаарч ажилласны дагуу Стандарт, хэмжил зүйн газар “Стандарт ба Хөгжил” үндэсний хөтөлбөр, “Төрөөс стандартчилал, хэмжил зүйн талаар баримтлах бодлого”-ын баримт бичгийг боловсруулан, орон даяар хэлэлцүүлэг өрнүүлснээр Стандартчилал, техникийн зохицуулалт, тохирлын үнэлгээний итгэмжлэлийн тухай хууль, түүнтэй нийцүүлэн гаргах эрх зүйн баримт бичгүүдийн шинэчлэх ажлыг эхлүүлээд байна.
Монгол Улсын Ерөнхийлөгчийн санаачилсан “Хүнсний хувьсгал” үндэсний хөдөлгөөн, Монгол Улсын Засгийн газрын экспортыг дэмжих бодлогын хүрээнд Булангийн орнуудын хамтын ажиллагааны зөвлөлийн дэргэдэх Итгэмжлэлийн төвөөр Стандарт, хэмжил зүйн газар “халал гэрчилгээ” олгохоор магадлан итгэмжлэгдсэн нь Халал стандартыг хангасан Монгол мах, махан бүтээгдэхүүнийг тус бүс нутагт экспортлох үүд хаалга аж ахуйн нэгж, компаниудад нээлттэй боллоо.
Стандарт, хэмжил зүйн газар 2023 онд Олон Улсын Стандартчиллын байгууллага (ISO), Олон Улсын Цахилгаан техникийн хороо (IEC), Олон Улсын Хууль эрхийн хэмжил зүйн байгууллага (OIML), Ази, Номхон далайн хэмжил зүйн хөтөлбөр (APMP) зэрэг олон улсын байгууллагууд болон ОХУ, БНХАУ, Канад, Герман, БНСУ, Турк, Чех, Беларус зэрэг орнуудтай гадаад хамтын ажиллагаагаа улам бэхжүүлсний зэрэгцээ Ази номхон далайн хэмжил зүйн хөтөлбөр (АРМР)-ийн хурлыг Монгол Улсад зохион байгууллаа.
Стандарт, хэмжил зүйн газар 2024 оныг “Стандартын хэрэгжилтийн үр дүнг нэмэгдүүлэх” жил болгон зарласан бөгөөд бүхий л салбарт стандартыг хэрэгжүүлж, хэмжлийн нэгдмэл байдал, бүтээгдэхүүн, үйлчилгээний тохирлын баталгаа, сорилт, шинжилгээний үнэн зөв, найдвартай байдлыг ханган улс орныхоо хөгжил дэвшил, иргэдийнхээ эрүүл, аюулгүй амьдралын баталгааг дээшлүүлэх үйлсэд Та бид хамтдаа зүтгэцгээе.
Сайхан ирээдүйд дөтлөх XVII дугаар жарны "Хилэнт эх" хэмээх модон Луу жилдээ Та бүхэн амжилт бүтээлээр тэгш дүүрэн байж, сар шинэдээ сайхан шинэлээрэй!