МУ-ын Шадар сайдын 2018 оны 108 дугаар тогтоолоор баталсан “Үндэсний чанарын шагнал олгох журам”-ын хүрээнд Стандарт, хэмжил зүйн газар болон Монголын үндэсний худалдаа аж үйлдвэрийн танхим хамтран шалгаруулалтыг явуулж шагналыг өчигдөр /2023.03.30/ "Чингис хаан" үндэсний музейд зохион байгуулагдсан "Стандарт ба хөгжил" нэгдсэн хэлэлцүүлгийн үеэр гардууллаа. Үүнд:
“Шилдэг байгууллага”-аар “Кашмер холдинг” ХХК нь шалгарлаа. Бүтээгдэхүүний өнгө, дизайн, чанарт онцгой анхаарч техник технологийн шинэчлэлийг үе шаттайгаар нэвтрүүлж, хөрөнгө оруулалт, маркетинг, борлуулалтын бодлогыг хэрэгжүүлэн “Эвсэг”, “Нирун”, “Alfred Rowland”, “Топ донж” брендээр ноос, ноолууран бүтээгдэхүүнээр олны танил болсон юм.
Тус компани нь 990 гаруй хүнийг ажлын байраар хангахаас гадна 40 гаруй жижиг үйлдвэрлэл, хувиараа хөдөлмөр эрхлэгчдийг захиалгат ажлаар ханган ажилдаг байна. Мөн ерөнхий боловсролын 29-р тусгай сургууль болон МСҮТ-тэй хамтран оюутан сурагчдыг сургаж, ажиллуулах, түүнчлэн ШШГЕГ-ын харъяа 409-р ангид зөөлөн оёдлын болон сүлжих оёх цехийг байгуулан хүмүүжигчдэд мэргэжил олгох зэргээр нийгмийн хариуцлагын хүрээнд манлайллыг үзүүлж байна.
“Шилдэг бүтээгдэхүүн”-ээр "Милко" ХХК-ийн “Зөв брэнд” шалгарсан байна. Тус компани нь 2007 оноос малын сүүг, орчин үеийн дэвшилтэд технологитой хослуулан “Зөв” аарцны ундааг 2010 оноос зах зээлд гаргасан бөгөөд одоо хэрэглэгчдийн сэтгэлд нийцсэн бүтээгдэхүүний нэг юм.
Өдгөө “Зөв” брэндийн бүтээгдэхүүнийг шингэн аарц, хатаасан аарц, аарцтай үрэл гэсэн 3 категорийн хүрээнд 33 нэр төрөлтэй болгон өргөжүүлж, ОХУ, БНХАУ, БНСУ, Бүгд Найрамдах Казахстан улс, Бүгд Найрамдах Киргиз улсын зах зээл рүү экспортолж, Монгол Улсын экспортын бүтээгдэхүүнийг солонгоруулахад хувь нэмрээ оруулж байна. Түүнчлэн бүтээгдэхүүний чанар, аюулгүй байдал, байгаль орчин, хөдөлмөрийн аюулгүй байдал, эрчим хүчний хэмнэлтийг хангах хүрээнд менежментийн тогтолцоог олон улсын стандартын дагуу хэрэгжүүлсэн байгууллага юм.
“Шилдэг үйлчилгээ”-ээр "Барловорлд Монголиа" ХХК шалгарсан юм. Машин тоног төхөөрөмжийн түлш, тос, хөргөлтийн шингэний шинжилгээний лабораторийн үйлчилгээг орчин үеийн өндөр нарийвчлал бүхий спетрометрийн багаж тоног төхөөрөмжөөр үйлчилдэг байгууллага юм.
Өдгөө 13 дахь жилдээ тасралтгүй үйл ажиллагаа гүйцэтгэж байна. Лаборатори нь ISO/IEC 17025 стандартын шаардлагын дагуу 3 удаа итгэмжлэгдсэн бөгөөд Олон Улсын CAT S·O·SSM үйлчилгээний стандартын шаардлагыг хангасан лаборатори юм.
Монгол Улсын Засгийн газраас хэрэглэгчдийг чанартай, аюулгүй, баталгаатай бүтээгдэхүүн үйлчилгээгээр хангах, үндэсний үйлдвэрийн бүтээгдэхүүний өрсөлдөх чадварыг сайжруулах, экспортыг нэмэгдүүлэх, импортыг орлох бүтээгдэхүүн үйлдвэрлэх чиглэлээр ажиллаж тодорхой үр дүнд хүрсэн, үйл ажиллагаандаа чанар, байгаль орчин, хүнсний аюулгүй байдлын зэрэг менежментийг тогтолцоог олон улсын стандартын дагуу амжилттай хэрэгжүүлсэн, компанийн нийгмийн хариуцлагыг хэрэгжүүлэгч аж ахуйн нэгж, байгууллагыг шалгаруулан олон нийтэд сурталчилан таниулах, алдаршуулах зорилгоор “Үндэсний чанарын шагнал”-ыг 2015 оноос олгодог болсон юм.