Стандарт, хэмжил зүйн газрын дарга Б.Билгүүн болон төв орон нутгийн удирдлагууд Эрчим хүчний зохицуулах хорооны үйл ажиллагаатай танилцлаа.
Эрчим хүчний зохицуулах хорооны дарга А.Тлейхан тус арга хэмжээг нээж хэлсэн үгэндээ “Манай байгууллага Эрчим хүчний хэмнэлтийн хуулийг гол хэрэгжүүлэгч болохын төлөө ажилладаг. Тэр ч утгаараа 1967 оны барилгын суурин дээр эрчим хүчний хэмнэлт бүхий нарны панелаар эрчим хүчний хэрэглээний 60 хувийг шийддэг барилга барьсан. Эрчим хүч төдийгүй цаас хэмнэж, цахимаар өдөр тутмын үйл ажиллаагаа явуулдаг болсон” гэсэн юм. Мөн энэ үеэр Стандарт, хэмжил зүйн газрын дарга Б.Билгүүн хэлэхдээ “Манай хоёр байгууллага нягт хамтын ажиллагаатай хамтарч ажилласаар ирсэн. Цаашдаа ч хамтын ажиллагаа маань гүнзгийрнэ гэдэгт итгэлтэй байна. Тухайлбал, 2022 оны төлөвлөгөөнд батлуулахаар тусгасан стандартуудын 60 гаруй хувь нь эрчим хүчний стандартууд байгаа. Манайх төр, хувийн хэвшлийн сайн туршлагуудыг судалсаар ирсэн. Энэ удаа эрчим хүчний хэмнэлт болоод үйл ажиллагааны цахимжуулалтын сайн туршлагыг судлахаар танай дээр ирсэн бөгөөд халуун дулаан угтан авсан Та бүхэнд талархлаа илэрхийлье” гэлээ.
Мөн энэ үеэр тус хорооны Захиргаа удирдлагын газрын дарга Хөгжлийн стратеги төлөвлөлтийнхөө талаар товч танилцуулсан. Хүний нөөцөө хөгжүүлэх, ажилтнуудын идэвх санаачилгыг дэмжих, ингэснээр ажлын үр дүнд ямар их нөлөө үзүүлдгийг тухайн байгууллагын стратеги төлөвлөгөөний үр дүнгээс харж болохоор байв.
Тус хорооны танилцуулга арга хэмжээ дууссаны дараа эрчим хүчний хэмнэлтийн сонгодог жишээ болоод буй барилгатай танилцсан юм. Нарны панелаар эрчим хүчний нөөцөө бүрдүүлээд зогсохгүй, дулаан алдагдлаас хамгаалсан хана, уур тусгаарладаг шилэн хийц, улирлын температураас шалтгаалж, халуун хүйтнээ тохируулдаг байгууламж гээд орчин үеийн технологийн шийдлийг үнэхээр сайн ашиглаж чаджээ. Тус байгууллагын олонх нь залуучууд байдаг бөгөөд өөрсдийн нөөц боломж, чадвараа ашиглан шинэ технологи үргэлж нэвтрүүлдгээ А.Тлейхан дарга хэлж байсан. Тухайлбал, одоо цахилгаанаар ажилладаг машин ашигладаг болохоор туршилтын шатанд явж байгаагаа дурдсан бөгөөд машин угаалгын газраа хүртэл өөрсдөө барьж байгуулсан гэнэ лээ. Албан газар гэдэг бол тухайн ажилтны хоёр дахь гэр байдаг. Тэрчлэн ажилчдынхаа ая тухтай байдлыг хангасан фитнес, цайны газар, номын фонд гэх мэт ч бас тус байгууллагаас үлгэр авах сайн туршлага байлаа.
Ийнхүү үйл ажиллагааны бүхий л талаараа үлгэр жишээ болсон Эрчим хүчний зохицуулах хороотой танилцсан үр дүнтэй уулзалт болж өндөрлөлөө.