2021 оны 11-р сарын 03-ны өдрөөс эхлэн Ази номхон далайн хэмжил зүйн хөтөлбөр /АРМР/-ийн холбогдох хэмжлийн техникийн хороодууд, бүс нутгийн болон үндэсний асуудал, хэрэгцээнд хэмжил зүйн асуудлаар дэмжлэг үзүүлэх зорилготой чиглүүлэгч фокус группүүд, хөгжиж буй орнуудын хорооны 2021 оны хэмжил зүйн үйл ажиллагааны тайлангийн хурлууд мөн АРМР-ийн ерөнхий чуулган (APMP GA) цахимаар зохион байгуулагдаж байна.
Хэмжлийн холбогдох техникийн хороодууд /цахилгаан соронзон, масс болон холбогдох хэмжигдэхүүнүүд, цаг давтамж, урт, акустик, шингэний зарцуулалт, фотометр, хими болон биологийн хэмжил, чанарын тогтолцоо, ионжуулах цацраг, дулаан, материалын хэмжил зүй/ тухайн хэмжлийн чиглэлээр Ази номхон далайн орнуудын хийж гүйцэтгэж байгаа судалгааны ажлууд, CIPM MRA хүрээнд хийж гүйцэтгэсэн ажлууд, олон улсын харьцуулалтуудын талаар илтгэл мэдээллийг хэлэлцэв.
АРМР-ийн дэргэд Цаг уурын өөрчлөлт ба цэвэр агаар, Хүнсний аюулгүй байдал, Эрчим хүчний үр ашиг, Эрүүл мэндийн хэмжил зүй, Цэвэр Ус зэрэг фокус группүүд ажилладаг ба эдгээр нь улс орнуудын үйлдвэрлэлийн болон бусад оролцогч талуудын хэрэгцээ шаардлагад хэмжил зүйгээр дэмжлэг үзүүлэх, дээрх асуудлуудаар эрдэм шинжилгээ, туршилтын ажлын туршлагаа хуваалцаж, сургалт, семинар зохион байгуулж, шинэ төсөл хөтөлбөрүүдийг санхүүжүүлдэг юм.
Монгол Улсыг төлөөлж СХЗГ нь Ази номхон далайн хэмжил зүйн хөтөлбөр (АРМР) байгууллагын жинхэнэ гишүүнээр ажилладаг тул дээрх цахим уулзалт, арга хэмжээнүүдэд идэвхтэй оролцож байна.
Хэмжил зүйн мэргэжлийн байгууллагууд болон бусад сонирхогч, оролцогч талуудыг СХЗГ-аар дамжуулан олон улсын түвшний судалгаа мэдээллүүдтэй холбогдох чиглэлээр танилцан мэдлэг туршлагаа өргөжүүлэн ажиллахыг урьж байна.
