Уул уурхай зуны улиралд идэвхиж, ажлууд ид өрнөж, алт сорьцлуулах иргэд, аж ахуйн нэгж байгууллагын тоо эрчимтэй нэмэгддэг. Тэгвэл үүнтэй холбоотойгоор Сорьцын хяналтын газар ажлын цагийн хуваарьтаа өөрчлөлт орууллаа.
Энэхүү өөрчлөлтийг “Алт-2” үндэсний хөтөлбөрийн хэрэгжилтийн хүрээнд алт үйлдвэрлэгч, олборлогч иргэд, аж ахуйн нэгж байгууллага, мэргэжлийн холбооноос ирүүлсэн санал, хүсэлтийн дагуу зуны хуваарьт орсон байна. Зуны цагийн хуваарь нь 2023 оны 06 дугаар сарын 01-ний өдрөөс 07:30-15:30 хооронд ажиллаж, 2023 оны 09 дүгээр сарын 01-ний өдрийг хүртэл үргэлжлэх юм байна.
Монгол банк болон арилжааны банкууд үнэт металл худалдан авалт хийх хугацаа өдөр бүрийн 16 цаг хүртэл байдаг. Мөн үнэт металлын ханш дэлхийн зах зээлээс шалтгаалан өдөр бүр өөрчлөгдөж байдаг. Ханш өндөр тухайн өдөр амжих иргэдийн дараалал бий болохоос гадна хотын түгжрэлээс үүдэн харилцагчид цаг алдаж, хоцрох зэрэг бэрхшээлтэй тулгардаг байсан асуудлыг нэг цагаар сунгаж шийдсэн байна.
Алт олборлолт, үйлдвэрлэлийн өндөр ачаалалтай байх хугацаанд илүү цагаар болон долоо хоногийн амралтын өдөр ажилласан албан хаагчдыг Хөдөлмөрийн тухай хуульд заасны дагуу нөхөн амруулах арга хэмжээ авч ажиллахыг Сорьцын хяналтын газрын дарга Д.Бэхбат-д үүрэг болголоо.