Олон Улсын Цахилгаан Техникийн Хорооны 85 дугаар Ерөнхий Чуулганы нээлт энэ сарын 03-ны өдөр боллоо. Тус чуулган нь Арабын Нэгдсэн Эмират Улсын Дубай хотноо энэ сарын 03-ны өдрөөс 08 хүртэл үргэлжлэх бөгөөд биечлэн болон цахимаар зохион байгуулагдаж буй юм. Энэ жилийн Ерөнхий Чуулган “Аж үйлдвэрийн IV хувьсгалыг стандартчилалаар тэргүүлье” уриан дор зохион байгуулж байна. Тус чуулганд нийт 215 төлөөлөгч оролцож байгаа бөгөөд нээлтийн арга хэмжээнд 100 гаруй төлөөлөгч цахимаар оролцлоо.
Монгол Улсыг төлөөлөн Стандарт, хэмжил зүйн газрын Стандартчилал, тохирлын үнэлгээний бодлогын газрын дарга Б.Эрдэнэзул биечлэн оролцож буй бөгөөд Стандарт, хэмжил зүйн газрын дарга Б.Билгүүн болон тус газрын мэргэжилтнүүд цахимаар оролцож байна.
Монгол Улсын Стандарт, хэмжил зүйн газар нь Олон Улсын Цахилгаан Техникийн Хорооны Түнш орны хөтөлбөрт 2000 онд нэгдсэнээс хойш стандартчиллын салбарт сайн туршлагыг нэвтрүүлж, хүний нөөцөө чадавхижуулан, үр ашгийг нь хүртэж ирсэн.
2021 оны эхнээс Монгол Улсын Стандарт, хэмжил зүйн газрын Стандартчилал, тохирлын үнэлгээний бодлогын газрын дарга асан Г.Батцэнгэл Монгол улсаа төлөөлөн Олон Улсын Цахилгаан техникийн хорооны Түншлэгч орны хөтөлбөрийг даргалж байгаа юм.
Дэлхий нийтийг хамарсан цар тахлын улмаас цахим хувьсал эрчимтэй явагдаж байна. Энэ жилийн Ерөнхий Чуулганаар дэвшилтэт технологийн хөгжилд өндөр ач холбогдол өгч, стандартчилал дахь технологийн дэвшил, хиймэл оюун ухаан, цахим инновацийг улс орны нийгэм, эдийн засаг, байгаль орчинд ээлтэйгээр хэрхэн ашиглаж болох талаар их судалж, алхам алхмаар ахисаар байна. Монгол улс Олон Улсын Цахилгаан Техникийн Хорооны Түншлэгч орны хөтөлбөрт хамрагдаж, тус хөтөлбөрийг даргалж буйн хувьд дэлхийн өндөр хөгжилтэй орнуудтай зэрэгцэн урагшлах боломж бүрдээд байна.