Стандарт, хэмжил зүйн газрын Хэмжил зүйн хүрээлэн нь Монгол Улсын эдийн засаг нийгмийн хөгжлийн хэрэгцээ шаардлагын дагуу улсын эталоныг бий болгон, хадгалж, олон улсын эталоноос хэмжлийн нэгжийг дамжуулан авч Монгол Улсад хэмжлийн нэгдмэл байдлыг ханган ажилладаг.
СХЗГ нь Монгол Улсын хэмжлийн үнэн зөв, нэгдмэл байдлыг олон улсад ижил тэнцүү байгааг илтгэх, хүлээн зөвшөөрүүлэх үүрэг хүлээн ажилладаг ба 2013 оны 10 дугаар сард Жин хэмжүүрийн олон улсын хорооны харилцан хүлээн зөвшөөрөх хэлэлцээр /CIPM MRA/-д нэгдэн гарын үсэг зурсан билээ.
ХЗХ-ийн Цахилгааны эталоны лаборатори нь Үндэсний итгэмжлэлийн төвөөс MNS ISO/IEC 17025 стандартын шаардлагын дагуу итгэмжлэгдсэн ба 2021 оны 8 дугаар сарын 24, 25-ны өдрүүдэд цахилгааны 2 эталоны нэгж дамжуулалтын, Жин, хэмжүүрийн олон улсын байгууллагаас гаргасан 5 ангилалд БНСУ-ын Эталон, эрдэм шинжилгээний хүрээлэн /KRISS/-ийн доктор Мун Сеог Ким ижил түвшний үнэлгээг цахимаар хийлээ.
Энэхүү үнэлгээний гол шалгуур үзүүлэлт нь олон улсын харьцуулалт байдаг бөгөөд ЦЭЛ нь 2011-2017 онуудад Ази номхон далайн хэмжил зүйн хөтөлбөр /АРМР/ болон ЕвроАзийн хэмжил зүйн байгууллага /СООМЕТ/-аас зохион байгуулсан 2 түлхүүр, 2 нэмэлт харьцуулалтуудад оролцож хангалттай үр дүн үзүүлсэн юм.
Мөн ижил түвшний техникийн үнэлгээний үеэр лабораторийн үйл ажиллагаа, нэгж дамжуулалт, эталон төхөөрөмжийн хангалт, ажилтны мэдлэг, чадвар, шалгалт тохируулга гүйцэтгэх аргачлал, хэмжлийн эргэлзээний тооцооллыг олон улсын харьцуулалтын үр дүнгийн хамт шалгаж үнэлсэн.
Үнэлгээний тайланг Ази номхон далайн хэмжил зүйн хөтөлбөр /АРМР/ болон бусад бүс нутгийн хэмжил зүйн байгууллагууд, Жин, хэмжүүрийн олон улсын байгууллага хянаж баталгаажуулснаар Жин, хэмжүүрийн олон улсын байгууллагын мэдээллийн санд бүртгэгдэнэ.
Чанарын дэд бүтцийн үндсэн бүрэлдэхүүн болох Үндэсний хэмжил зүйн хүрээлэнгийн хэмжлийн чадавхыг олон улсад хүлээн зөвшөөрүүлснээр бүтээгдэхүүний чанар, техникийн үзүүлэлтийг тодорхойлж байгаа хэмжлийн үр дүнг олон улсад шууд хүлээн зөвшөөрч, худалдаан дахь саад тотгорыг багасгаж, эдийн засагт дэмжлэг үзүүлэх чухал ач холбогдолтой юм.
ХЗБГ-ын ХЭМЖИЛ ЗҮЙН ХҮРЭЭЛЭН