Хятад-Монголын дөрөв дэх экспо есдүгээр сарын 6-ны өдөр БНХАУ-ын Өвөр Монголын Өөртөө Засах орны Хөх хотноо нээлтээ хийлээ. Энэ үеэр Монгол-Хятадын ОУ-ын Стандартчиллын хоёр дахь удаагийн форумд Стандарт, хэмжил зүйн газрын төлөөллүүд оролцож байна.

Энэхүү хоёр дахь дугаар форум "Стандарт-ногоон хөгжлийг дэмжиж, худалдааг хөнгөвчлөх нь" сэдвийн дор 2023 оны 09 сарын 06-10-ны өдрүүдэд зохион байгуулагдаж байна.

Хятад, Монголын төрийн болон хувийн хэвшлийн байгууллагуудын 200 гаруй төлөөлөгчид уг форумд оролцож, стандартчиллын хөгжил дэвшил, ач холбогдол, цаашдын чиг хандлага, шийдлийн талаар хэлэлцэж байна. Форумыг нээж ӨМӨЗО-ны Ардын Засгийн газрын дэд дарга Чи Бат, Стандарт, хэмжил зүйн газрын даргын албан үүргийг түр орлон гүйцэтгэгч Б.Ууганбаяр, БНХАУ-ын Үндэсний зах зээлийн хяналт удирдлагын газрын дэд дарга Тянь Шы Хун нар үг хэллээ.

СХЗГ-ын даргын албан үүргийг түр орлон гүйцэтгэгч Б.Ууганбаяр: "БНХАУ болон Монгол Улсын хоорондын урт удаан хугацааны найрсаг харилцааг цохон тэмдэглэж, энэ удаагийн стандартчиллын форум ногоон хөгжлийн асуудалд төвлөрч буй нь маш цаг үеэ олсон хэлэлцүүлэг болох нөхцлийг бүрдүүлж байна" хэмээн онцоллоо.

Тус форумд Стандарт, хэмжил зүйн газрын Стандартчилал, тохирлын үнэлгээний бодлогын газрын ахлах мэргэжилтэн Д.Төрмөнх “Монгол Улсын Эрчим хүчний стандартчиллын техникийн хороо, эрчих хүчний стандартчиллын өнөөгийн байдал” сэдвээр илтгэл мэдээлэл хийлээ.

Уг экспо нь оролцогч аж ахуйн нэгжийн тоог 30 хувиар өсгөж, нийт 35 орны бараа бүтээгдэхүүнийг дэлгэн танилцуулж цар хүрээгээ өргөжүүлсэн онцлогтой болж байгаа юм. Үзэсгэлэнд Манай Улсын 500 аж ахуй нэгж оролцож байгаагийн 95 хувь нь жижиг, дунд үйлдвэрлэл эрхлэгч байна. Салбар чиглэлийн хувьд 95 хувь нь хүнс, мал аж ахуйн салбарын баялаг бүтээгчид байгаа юм. Мөн Монгол, Хятад хоёр улсын худалдаа, эдийн засгийн эргэлтийг нэмэгдүүлэхэд чухал нөлөө үзүүлж буй тус арга хэмжээний хүрээнд хөрөнгө оруулалтыг татах хурал, форумууд зохион байгуулагдаж байна.