2021 оны 8 дугаар сарын 16-ны өдөр Монгол Улсын Шадар сайдын Зөвлөх Д.Батболд Стандарт, хэмжил зүйн газарт ажиллаж, Хэмжил зүйн Зөвлөлийн дүрэм, Зөвлөлийн бүрэлдэхүүний төсөл, СХЗГ-ын 2021-2024 оны стратеги төлөвлөгөө, Улсын төсвийн 2022 оны хөрөнгө оруулалтаар хийгдэх арга хэмжээ, зардлын төслүүдтэй танилцлаа.
Хэмжил зүйн тухай хуулийн шинэчилсэн найруулгаар Хэмжил зүйн зөвлөлийн дүрэм, бүрэлдэхүүнийг Монгол Улсын Засгийн газар батлахаар хуульчилсан бөгөөд зөвлөл нь төр, шинжлэх ухааны болон төрийн бус байгууллагын төлөөлөөс бүрдэх юм.
Шадар сайдын зөвлөх Д.Батболд Хэмжил зүйн зөвлөлийн бүрэлдэхүүнд төрийн бус байгууллага болон хэмжил зүйн чиглэлээр судалгаа, шинжилгээ хийдэг эрдэмтэн, судлаачдын оролцоог нэмэгдүүлэх нь зүйтэйг уулзалтын явцад онцоллоо. Түүнчлэн тусгайлсан чиг үүргийн салбарт хэмжил зүйн талаар санал, дүгнэлт гаргах үйл ажиллагаанд тухайн салбарын төлөөллийг зөвлөлийн бүрэлдэхүүнд оролцуулах асуудлыг дүрэмд тусгах талаар өөрийн саналыг танилцууллаа.
Цаашид хэмжил зүйн зөвлөл нь зөвхөн хэмжих хэрэгслийн загварын туршилт, хэмжил зүйн үйл ажиллагаа эрхлэх аж ахуйн нэгжийг бүртгэх санал, дүгнэлт гаргах бус хэмжил зүйн талаар баримтлах бодлого нь салбаруудын уялдаа холбоог хангасан, УИХ, Засгийн газар, Шадар сайдын хэмжээнд шийдвэр гаргахад шаардлагатай бодлогын асуудлыг хөндсөн, хэмжил зүйн тухай хууль тогтоомжийн хэрэгжилтийн тайланг хэлэлцэн тулгамдсан асуудлын шийдлийн хувилбар боловсруулдаг байх ёстой талаар байр сууриа илэрхийллээ.
Стандарт, хэмжил зүйн газар нь Хэмжил зүйн зөвлөлийн дүрмийн төсөл, бүрэлдэхүүнийг 2021 оны 08 дугаар сард багтаан Монгол Улсын Засгийн газраар хэлэлцүүлэхээр ажиллаж байгаа бөгөөд Шадар сайдын зөвлөх зөвлөлийн дүрэм, бүрэлдэхүүний төсөлд ач холбогдол өгч ажиллаж байгаад Стандарт, хэмжил зүйн газрын дарга Б.Билгүүн талархаж байгаагаа уулзалтын явцад илэрхийллээ.
Энэ арга хэмжээнд Шадар сайдын зөвлөх Д.Батболд, СХЗГ-ын дарга Б.Билгүүн, Захиргаа удирдлагын газрын дарга Б.Ууганбаяр, ахлах мэргэжилтэн З.Мөнхбат, Хэмжил зүйн бодлогын газрын даргын үүргийг түр орлон гүйцэтгэгч Д.Нарангэрэл, ахлах мэргэжилтэн Ц.Алтанцэцэг, Н.Сэргэлэн, Санхүүгийн хэлтсийн төлөөлөл оролцож холбогдох чиглэлээр танилцуулга, мэдээлэл өгч ажиллалаа.