“ДЭЛХИЙН ХЭМЖИЛ ЗҮЙН ӨДӨР”-ИЙН МЭНДЧИЛГЭЭ
2023.05.19
Та бүхэндээ энэ өдрийн мэндийг хүргэе.
Стандарт хэмжил зүйн салбарт ажиллаж байсан үе үеийн ахмад хэмжил зүйчид болон одоо ажиллаж байгаа нийт ажилтан албан хаагч Та бүхэндээ Дэлхийн хэмжил зүйн өдрийн баярын мэндийг хүргэе.
Энэ өдөр бол үндэсний үйлдвэрлэгч, хэрэглэгч, иргэн бүрийн эрх ашгийг хамгаалах хэмжлийн нэгдмэл байдлыг хангах үүрэгтэй хэмжил зүйн шинжлэх ухааны, хэмжил зүйчдийн баярын өдөр юм.
Тэртээ 1923 онд Сангийн яамны дэргэд 3-н орон тооны бүрэлдэхүүнтэй Хэмжил зүйн алба байгуулсанаар Монгол Улсын хэмжил зүйн байгууллагын үндэс суурь тавигдсан бөгөөд энэ жил 100 жилийн түүхэн ойтойгоо золгож байна.
Өнгөрсөн 100 жилийн турш манай улсад хэмжил зүйн салбар тогтвортой хөгжиж ирсэн бөгөөд Олон улсын жин хэмжүүрийн товчоо/BIPM/, Олон улсын хууль эрхийн хэмжил зүйн байгууллага/OIML/, Ази номхон далайн хэмжил зүйн хөтөлбөр/APMP/ зэрэг олон улсын болон бүс нутгийн байгууллагуудтай хамтын ажиллагааг хөгжүүлэн хэмжлийн үр дүнгийн найдвартай, үнэн зөв байдлыг ханган ажиллаж байна.
Монгол Улсын Засгийн газрын тохируулагч агентлаг- Стандарт хэмжил зүйн газар нь Хэмжлийн нэгжийн олон улсын системийг нэвтрүүлэх, үндэсний эталоны тогтолцоог олон түвшинд хүргэх, хэмжих хэрэгслийн шалгалт баталгаажуулалтын чанар, хамрах хүрээг нэмэгдүүлж, Үндэсний хэмжээнд хэмжлийн нэгдмэл байдлыг хангах зорилго, зорилтыг Төв болон 21 аймагт Стандарт хэмжил зүйн хэлтэсээр дамжуулан хэрэгжүүлж байна.
Дэлхийн хэмжил зүйн өдрийг 1875 оны Метрийн хэлэлцээрийг баталсан өдрийг тохиолдуулан жил бүрийн 5 дугаар сарын 20-ны өдөр уламжлал болгон тэмдэглэдэг бөгөөд энэ жил “Хэмжил дэлхийн хүнсний тогтолцоонд дэмжлэг үзүүлэх нь” уриан дор тэмдэглэж байна.
8 тэрбум хүн амтай болсон дэлхийн хүнсний хангамж болон уур амьсгалын өөрчлөлтийн өсөн нэмэгдэж байгаа сорилтоос үүдэн энэ сэдвийг сонгосон байна.
Монгол Улсын Засгийн газар, Монгол Улсын Шадар сайдын зүгээс Стандарт хэмжил зүйн салбарын үйл ажиллагаанд ихээхэн анхаарч байгаа бөгөөд Хууль, Эрх зүйн орчноо боловсронгуй болгох, Стандарт, хэмжил зүйн талаар Төрөөс баримтлах бодлого, Стандарт ба хөгжил үндэсний хөтөлбөр боловсруулан 21 аймаг, яам болон мэргэжлийн байгууллагуудын дунд хэлэлцүүлсэн ба холбогдох шатны байгууллагад хүргүүлэн батлуулахаар ажиллаж байна.
Мөн түүнчлэн Монгол Улсын Засгийн газар 2022 онд “Мэргэжлийн хяналтын чиг үүргийг салбарын яамдад шилжүүлэх талаар авах арга хэмжээний тухай” 469 дүгээр тогтоолыг баталснаар хяналтын чиг үүрэг салбарын яамдад, Хэмжил зүйн төрийн хяналт Стандарт, хэмжил зүйн байгууллагад шилжсэн. Энэ зохицуулалтын дагуу хяналтын чиг үүрэг шилжсэн нь бодлого тодорхойлох-хэрэгжүүлэх, хяналт тавих цогц үйл ажиллагаа хэрэгжих боломж бүрдсэн.
Хяналтын чиг үүрэг шилжих шилжилтийн энэ үед бүтэц зохион байгуулалт, төсөв санхүү, салбар дундын уялдаа холбоог хангах, цахим мэдээллийн систем, эрсдэлийн удирдлага, төлөвлөлт болон зөрчил шалган шийдвэрлэх ажиллагаа зэрэгтэй холбоотой асуудал, бэрхшээл тулгарч байгаа бөгөөд үүнийг шийдвэрлэхэд Стандарт, хэмжил зүйн байгууллагаас эхлээд хувь иргэн бүрийн оролцоо, Та бүхний хамтын ажиллагаа, дэмжлэг маш чухал бөгөөд үүнийг үр дүнтэй хамтран хэрэгжүүлнэ гэдэгт итгэж байна.
Хэмжил зүйн салбарт ажиллаж байсан үе үеийн ахмадууд, энэ салбарт хүчин зүтгэж байгаа бүх хэмжил зүйчиддээ Дэлхийн хэмжил зүйн өдрийн баярын мэндийг дахин хүргэж, ажлын амжилт, эрүүл энх сайн сайхан бүхнийг хүсэн ерөөе.
Семинарын үйл ажиллагаа нээснийг мэдэгдэе.
Анхаарал тавьсанд баярлалаа