Монгол Улсын Шадар сайдын ивээл дор “Эрсдэл ба стандарт” сэдвийн хүрээнд үндэсний форум болж, амжилттай өндөрлөлөө. Эрсдэлийн үндэсний форум нь улс оронд тулгарч болзошгүй нийгэм, эдийн засаг, гамшгийн эрсдэлүүд, тэдгээрээс урьдчилан сэргийлэх арга замын талаар хэлэлцэж, бодит шийдлийг эрэлхийлж, төр, хувийн хэвшил, иргэний зүгээс эрсдэлийг удирдахад тодорхой хувь нэмэр оруулах зорилготой арга хэмжээ байлаа.
МОНГОЛ УЛСЫН ШАДАР САЙД С.АМАРСАЙХАН: ТООЦОО СУДАЛГААТАЙ, ҮНЭ ЦЭНЭТЭЙ, АЖИЛ ХЭРЭГЧ САНАЛУУДЫГ ХЭРЭГЖҮҮЛЭХЭД МИНИЙ БИЕ ОНЦГОЙЛОН АНХААРАХ БОЛНОМонгол Улсын Шадар сайд С.Амарсайхан форумыг нээж, хэлсэн үгэндээ; Өнгөрсөн хугацааны гашуун сургамжийг ирээдүйд давтахаас урьдчилан сэргийлэх, Аливаа эрсдэлийг урьдчилан тооцож төлөвлөх, Стандартыг мөрдүүлэх замаар гамшгийн болон бусад эрсдэлийг бууруулах, шилжүүлэх, Хариу арга хэмжээний стратеги төлөвлөлт, эрсдэлийн удирдлагын менежментийг сайжруулахад энэхүү форумын ач холбогдол оршиж байлаа. Монгол Улсад гамшгийн эрсдэлийн даатгалын тогтолцоо. Энэ тогтолцоо руу явахаас өөр гарцгүй. Даатгал бол зөвхөн санхүүгийн хэрэгсэл биш, байгалийн гамшиг, гэнэтийн аюул осол, эрсдэл тулгарахад хохирол багатайгаар даван туулах хамтын хүч юм. Хэлэлцүүлгийн хүрээнд яригдсан тооцоо судалгаатай, үнэ цэнэтэй, ажил хэрэгч саналуудыг хэрэгжүүлэхэд миний бие онцгойлон анхаарал хандуулах болно. Энэхүү форумаас гарсан санал дүгнэлтийг ажил хэрэг болгох тал дээр үргэлжлүүлэн ажиллаж, ажлын хэсэг, баг ажиллуулж, Засгийн газар, орон нутгийн түвшинд хэрэгжүүлэх ажлыг эрчимтэй үргэлжлүүлнэ” хэмээн хэлсэн юм.
Б.УУГАНБАЯР: СТАНДАРТ САЛБАР БҮРТ ХАНГАЛТТАЙ БАЙНА ГЭВЧ ХЭРЭГЖҮҮЛЭХ, ИМПОРТООР ОРЖ ИРЖ БАРАА, БҮТЭЭГДЭХҮҮНД СТАНДАРТЫН ДАГУУ ХЯНАЛТ ШАЛГАЛТ ХИЙХГҮЙ БАЙНА
Уг 14 дэх жилдээ болж буй арга хэмжээнд Стандарт, хэмжил зүйн газар хамтран зохион байгуулж оролцлоо. СХЗГ-ын даргын албан үүргийг түр орлон гүйцэтгэгч Б.Ууганбаяр: “Стандартыг хэрэглэхгүй салбар гэж байхгүй. Стандарт нь өөрөө маш олон талт харилцааг зохицуулж байдаг. Үүнд: Худалдааг хөнгөвчлөх, Бизнесийн өрсөлдөх чадварыг нэмэгдүүлэх, Аюулгүй байдлыг хангах, Эрсдлийг бууруулах зэрэг. Дэлхийн улс орнууд эрсдлээ удирдах, эрсдлээ бууруулах, эрсдлээс урьдчилан сэргийлэхэд стандартыг үйл ажиллагаандаа дагаж мөрдөж байна. Бид стандартыг ажил амьдралдаа хэрэгжүүлж, амьдралын дадал хэвшил болгох ёстой. Энэ нь эрсдлийг бууруулах гол хэрэгсэл. Стандартыг мөрдөхгүй байх нь нийгмийн эрсдлийг бий болгож байна. Бүх салбарт стандарт хангалттай байна. Гэвч хэрэгжүүлэх, импортоор орж ирж байгаа бараа бүтээгдэхүүнд стандартын дагуу хяналт шалгалт хийхгүй байна. Энэ нь өөрөө эрсдэл. Байгалын давагдашгүй хүчин зүйлийг бүрэн сэргийлж чадахгүй ч Бүтээн байгуулалт, дэд бүтцийг шийдэхдээ стандартын шаардлага, норм дүрэм, техникийн зохицуулалтыг ягштал баримталснаар иргэдэд учирч болох эрсдлээс хамгаалж буй хамгийн том шийдэл болно” хэмээн онцлон хэлсэн юм.
Энэ үеэр эрхэлсэн салбартаа амжилт гаргаж, хүний амь нас, эрүүл мэнд, эд хөрөнгийг авран ажиллаж буй Төв аймгийн Онцгой байдлын газрын Зуунмод сум дахь Гал түймэр унтраах, аврах 24 дүгээр ангийн Гал унтраах автомашины жолооч, ахлах ахлагч Д.Оюунбаатар, эх оронч иргэний үүргээ нэр төртэй биелүүлж байгаа Пажеро клубын нийт гишүүд, иргэд, хөдөлмөрийн шаардлага, аюулгүй байдлын нөхцөлийг орчин үеийн стандарт, шаардлагад нийцүүлэн, осолгүй манлайлан ажиллаж буй “Баялаг Энержи Ресурс” компанийн хамт олонд 2023 оны “Эрсдэлийн баатар” боллоо.
Ийнхүү гурван өдөр үргэлжилсэн эрсдэлийн удирдлагын менежментийг сайжруулах зорилготой “ЭРСДЭЛИЙН ҮЕИЙН СЭТГҮҮЛ ЗҮЙ” сэдэвт салбар хуралдаан болсон нь онцлогтой байлаа. Хэвлэл мэдээлэл, сэтгүүл зүйн хэлэлцүүлэгт иглүүлэгчээр сэтгүүл зүй судлаач, профессор Ж.Батбаатар, панелистаар Монголын сэтгүүлчдийн нэгдсэн эвлэлийн хууль эрх зүй, ёс зүй хариуцсан дэд ерөнхийлөгч З.Боргилмаа, Зариг.мн сайтын эрхлэгч Н.Өнөрцэцэг, Монголын сэтгүүлчдийн нэгдсэн эвлэлийн ерөнхийлөгч Ө.Отгонбаатар нар оролцож мэдээлэл солилцсон юм.
Уг арга хэмжээг Онцгой байдлын ерөнхий газар, Стандарт, хэмжил зүйн газар, нийслэл болон 21 аймгийн Засаг даргын Тамгын газар хамтран улсын хэмжээнд зохион байгуулсан. Форумын үйл ажиллагаанд төр, иргэний нийгэм, хэвлэл мэдээллийн байгууллага болон НҮБ-ын Хүнс, хөдөө аж ахуйн байгууллага, Хүүхдийн сан, Хүн амын сан, ДЭМБ, МУЗН зэрэг олон улсын байгууллагуудын 2400 гаруй төлөөлөгч оролцлоо. Түүнчлэн 21 аймагт “Эрсдэл ба стандарт” үндэсний форумын салбар хэлэлцүүлгийг зохион байгууллаа.
