Манай улсад тээврийн хэрэгслийн резин дугуй засварын үйл ажиллагааг 400 орчим иргэн, ААН эрхэлдэг гэсэн судалгаа байдаг.

Дугуй засварын үйл ажиллагаанд мөрдөж ажиллах баримт бичиг хязгаарлагдмал байгаа нь дугуй засварын технологи, заавал ашиглах тоног төхөөрөмж, багаж хэрэгсэл, түүнд тавих хэмжил зүйн шаардлага зэрэг ойлгомжгүй олон асуудлыг бий болгож үйлчилгээ эрхлэгч иргэн, аж ахуйн нэгжүүд өөрсдийн туршлагаар дугуй засварын үйлчилгээг иргэдэд үзүүлж байгаа юм.

Тодруулбал, Дугуй засварын ажлын үед ажилласан масло ашиглаж дугуйг обуданд угсарч байгаа нь засварын ажлын үед таатай байдлыг бий болгож байгаа боловч хөдөлгөөний үед дугуй обуднаас мултрах үндэслэл болдог мөн засварын ажлын дараа дугуйн тэнцвэржүүлэх тохиргоог хийдэггүй энэ байдал нь тээврийн хэрэгслийн жолооны механизм болон явах ангийн  эвдрэл гэмтлийн эх үүсвэр болдог.

Үүнээс болоод резин дугуй нь автотээврийн хэрэгслийн хөдөлгөөний идэвхтэй аюулгүй байдлын эд анги ба түүнд хийх засвар үйлчилгээн дэх ойлгомжгүй болон технологийн горим зөрчсөн үйл ажиллагаа зам тээврийн осолд хүргэх үндсэн шалтгаан болдог талаар олон улсын болон дугуй үйлдвэрлэгч нарын судалгаа, тайланд тусгагдсан байна. 

Монгол улсад MNS 6969 дугаартай Тээврийн хэрэгслийн резин дугуй засварын үйлчилгээ. Ерөнхий шаардлага нэртэй стандартыг 2022 онд батлан мөрдөж эхэлсэн байдаг.

Өнөөдөр автомашин гангараа биш хэрэглээ болсон бөгөөд  бараг айл болгон тээврийн хэрэгсэлтэй байна. Тэгвэл автомашин эзэмшиж замын хөдөлгөөнд оролцогч та дугуй засварын газраар үйлчлүүлэхдээ ямар шаардлага тавих ёстойгоо өөрсдөө ч мэддэг байхад илүүдэхгүй.

Монгол улсад хүчин төгөлдөр мөрдөж байгаа стандарттай www.estandard.gov.mn цахим хуудаснаас харж танилцаж болно.