Монгол Улсын Засгийн газрын тохируулагч агентлаг-Стандарт, хэмжил зүйн газар, БНХАУ-ын Хэмжил зүйн үндэсний хүрээлэн (NIM)-тэй цахим уулзалт амжилттай зохион байгуулагдлаа.
Энэхүү уулзалтад Монгол Улсын талаас СХЗГ-ын дарга Б.Билгүүн, ХЗХ-ийн дарга Д.Дамбасүрэн, төслийн зохицуулагч, ХЗХ-ийн ахлах мэргэжилтэн Д.Нарангэрэл, ХХШБГ-ын дарга Л.Баярхүү болон холбогдох мэргэжилтнүүд, БНХАУ-ын талаас Хэмжил зүйн үндэсний хүрээлэнгийн захирал, АРМР-ын дарга Фан Шан, Орлогч дарга доктор Дуан, Өвөр Монголын Хэмжил зүйн хүрээлэнгийн Захирал Ли Жинхуа, төслийн баг, холбогдох лабораторийн мэргэжилтнүүд зэрэг 40 гаруй төлөөлөл оролцов.
Уулзалтын хүрээнд дараах арга хэмжээнүүд зохион байгуулагдлаа. Үүнд:
- СХЗГ-ын дарга Б.Билгүүн, Хятадын Хэмжил зүйн хүрээлэнгийн дарга Фан Шан нар хэмжил зүйн салбарт хамтран ажиллах “Харилцан ойлголцлын санамж бичиг” (MoU)-ийн шинэчилсэн төсөлд урьдчилсан байдлаар цахимаар гарын үсэг зурав.
- Хоёр улсын Засгийн газрын Шинжлэх ухаан технологийн сангийн дэмжлэгээр Монгол Улсын Стандарт, хэмжил зүйн газар, Хятадын Хэмжил зүйн үндэсний хүрээлэн (NIM), Өвөр Монголын Хэмжил зүйн хүрээлэн (NMG) нар хамтран хэмжил зүйн салбарт хэрэгжүүлсэн “Эрчим хүчний салбар дахь Хэмжлийн эталон ба технологийн талаарх Хятад-Монголын хамтарсан судалгаа” төслийн хэрэгжилт, тайлан, үр дүнг хэлэлцэв.
- СХЗГ-NIM хооронд 2015 онд байгуулсан Санамж бичгийн хүрээнд хийгдсэн төсөл, арга хэмжээнүүд, тэдгээрийн хэрэгжилт, үр дүнгийн талаар хэлэлцэж, цаашдын хамтын ажиллагааны талаар харилцан санал солилцов.
Энэхүү цахим уулзалтаар Хятад - Монголын хэмжил зүйн хамтын ажиллагааг шатамхай шингэн, цахилгаан, эрүүл мэндийн салбарт шинэ шатанд хүргэх, үргэлжлүүлэн төсөл хөтөлбөр хамтран хэрэгжүүлэх, хамтын ажиллагааг хоёр улсын Засгийн газарт уламжлан дэмжлэг авч шийдвэрлүүлэх, мөн Монгол Улсын хэмжил зүйн салбарын ажилтнуудыг чадавхижуулах, тэр дундаа БНХАУ-ын их дээд сургуулиудад бакалавр, магистрын зэрэг эзэмшүүлэх чиглэлээр хамтран ажиллахаар харилцан тохиролцлоо.
Стандарт, хэмжил зүйн газар
