Стандарт, хэмжил зүйн газрын Бүтээгдэхүүн, тогтолцооны баталгаажуулалтын газраас байгууллагын менежментийн тогтолцоо нь олон улсын стандартын шаардлагад нийцэж буйг хөндлөнгийн, хараат бусаар үнэлж, гэрчилгээ олгодог. Энэ хүрээнд Стандарт, хэмжил зүйн газрын дэргэдэх Менежментийн тогтолцооны баталгаажуулалтын зөвлөл 2023 оны 5 дугаар сарын 31-ний өдөр хуралдаж дараах шийдвэр гаргалаа.
Тус хуралдаанаар чанарын менежментийн тогтолцоог ISO 9001:2015 стандартын дагуу хэрэгжүүлснийг баталгаажуулсан гэрчилгээг “Янмал” ХХК, “Хот төлөвлөлт, судалгааны институт” ОНӨААТҮГ-т 3 жилийн хугацаатай олгох; “Сүү” ХК-д олгосон чанарын болон хөдөлмөрийн аюулгүй байдал, эрүүл ахуйн менежментийн тогтолцооны ISO 45001:2018, ISO 9001:2015 стандартын дагуух баталгаажуулалтын гэрчилгээний хугацааг 3 жилээр тус тус сунгалаа.
Дээрх менежментийн тогтолцооны стандаруудыг байгууллагын цар хэмжээ, төрөл ба үйл ажиллагаанаас үл хамааран ямар ч байгууллага хэрэглэх боломжтой бөгөөд чанартай, аюулгүй бүтээгдэхүүн үйлдвэрлэх; хэрэглэгчийн сэтгэл ханамжийг дээшлүүлэх; эрүүл, аюулгүй ажлын байрыг бий болгоход чиглэсэн бодлого, зорилтоо хангахад байгууллагад тусалдаг.