2023 ОНЫ ҮЙЛ АЖИЛЛАГААГААР ТЭРГҮҮЛСЭН АЙМГУУД ШАЛГАРЛАА
Стандарт хэмжил зүйн газар өчигдөр /2024.01.23/ өнгөрөгч 2023 онд хийж хэрэгжүүлсэн ажлаа танилцуулж, мөн энэ оны бодлого, төлөвлөгөө, салбарын анхаарах асуудал боловсруулах зэрэг тайлант хурлыг зохион байгуулсан юм. Энэхүү арга хэмжээнд 21 аймаг болон салбар газрууд оролцсноороо онцлог байлаа. Тэгвэл өнгөрсөн 2023 оны ололт амжилтыг дүгнэн дөрвөн орон нутгийн аймаг байр эзэлж, шагнаж, урамшууллаа.
2023 ОНЫ ТЭРГҮҮН БАЙРААР ДАРХАН-УУЛ АЙМГИЙН СТАНДАРТ, ХЭМЖИЛ ЗҮЙН ХЭЛТЭС ШАЛГАРЛАА.
Тус аймаг нь 147 бүтээгдэхүүн, 228 үйлчилгээнд тохирлын баталгаажуулалт, 12300 хэмжих хэрэгсэлд шалгалт баталгаажуулалт, 84 хэмжих хэрэгсэлд шалгалт тохируулга, 3523 бүтээгдэхүүнд 8147 үзүүлэлтээр сорилт шинжилгээ, 1975 кг алтыг хайлж гулдмайлсан байна. Мөн "ДЭЛХИЙН ЧАНАРЫН ӨДӨР"-ийг тохиолдуулан ШУТИС Дархан ТИС-ийн Инженерчлэлийн салбартай хамтран "БҮТЭЭМЖ БА ИННОВАЦИ -2023" Олон улсын эрдэм шинжилгээ, онол практикийн бага хурал зохион байгуулсан. Төрийн үйлчилгээний нэгдсэн систем e-mongolia сайтаар иргэн, аж ахуйн нэгжүүдийн бүтээгдэхүүн, үйлчилгээний баталгаажуулалт хийлгэх хүсэлтийг цахимаар хүлээж авч төрийн бодлого чиглэлтэй нийцүүлэн үйл ажиллагаа эрхэлсэн байна.
ДЭД БАЙРАНД БАЯН-ӨЛГИЙ АЙМГИЙН СТАНДАРТ, ХЭМЖИЛ ЗҮЙН ХЭЛТЭС ТОДОРЛОО.
Баян-Өлгий аймгийн Стандарт, хэмжил зүйн хэлтэс нь Стандарт, хэмжил зүйн газартай хамтран Булангийн орнуудын хамтын ажиллагааны зөвлөлийн дэргэдэх Магадлан итгэмжлэлийн төв (GAC)–ийн олон улсын итгэмжлэлтийн үнэлгээнд амжилттай хамрагдаж чадсан юм. Үүний үр дүнд “Халал” бүтээгдэхүүнд баталгаажуулалт хийх эрхийг 4 жилийн хугацаатайгаар авлаа. Түүнчлэн 2023 онд Баян-Өлгий аймгийн Стандарт, хэмжил зүйн хэлтэс нь 427 сая төгрөгийн 2 давхар барилгын асуудлыг орон нутгийн төсвөөс шийдвэрлүүлж албан хаагчдын ажиллах, нөхцөлийг хангасан. Мөн орон нутгийн төсвөөс 18.5 сая төргөгийн эталон тоног төхөөрөмжийг шийдвэрлүүлж төрийн үйлчилгээ иргэдэд үзүүлэх боломжийг нэмэгдүүлсэн байна.
Мөн Монгол Улсын Шадар сайд С.Амарсайхан Стандарт, хэмжил зүйн салбарт онцгой анхаарал хандуулан ажиллаж байгаа энэ цаг үед Төрийн үйлчилгээг нээлттэй, шуурхай, нэг цэгээс хүргэх зорилгоор сургалт, мэдээлэл, арга зүйн зөвлөгөө өгөх, иргэд олон нийтэд стандартын талаар ойлголт өгөх, стандартыг сурталчлах, стандартаар үйлчлэх, стандартын талаар сургалт зохион байгуулах танхимыг СХЗХ-ийн анхны дарга Д.Хизат агсны үр хүүхдүүдтэй хамтран 11 сая төгрөгөөр тохижуулан Дакеин Хизат агсаны нэрэмжит сургалтын танхимтай болсон зэрэг амжилтаар дэд байрын шагнал хүртлээ.
ГУРАВДУГААР БАЙР ГОВЬ-АЛТАЙ АЙМГИЙН СТАНДАРТ, ХЭМЖИЛ ЗҮЙН ХЭЛТЭС ОРЛОО.
2023 онд СХЗГ-ын даргатай байгуулсан Гүйцэтгэлийн төлөвлөгөөний хэрэгжилтийг хангах, хууль тогтоомжийг хэрэгжүүлэх ажлыг амжилттай хэрэгжүүлснээр орон нутгийн төсвөөс 14 сая төгрөгийн уртын эталон тоног төхөөрөмж, Говь-алтай аймаг дахь Нэгдсэн үндэсний байгууллагын Хүүхдийн сангийн 5.5 сая төгрөгийн санхүүжилтээр Сорилтын лабораторид Ундны усыг шинжлэх зөөврийн төхөөрөмжтэй болсон байна. Ингэснээр төрийн үйлчилгээг тухайн суманд нь түргэн шуурхай үзүүлэх боломжтой болсон юм.
Шинийг санаачлагч Шилдэг номинаци шагналын эзэнээр БУЛГАН АЙМГИЙН СТАНДАРТ, ХЭМЖИЛ ЗҮЙН ХЭЛТЭС тодорлоо.
2022 оноос эхлэн СХЗГ-тай хамтран органик бүтээгдэхүүнийг баталгаажуулалтад хамруулах зорилт тавин хэрэгжүүлснээр 2023 онд Үндэсний итгэмжлэлийн байгууллагаар органик бүтээгдэхүүнийг баталгаажуулах чиглэлээр итгэмжлэлийн үнэлгээнд амжилттай хамрагдсан. Одоогийн байдлаар Булган аймгийн Гурван борхуд ХХК-ийн Халтар арвайн гурил, Сүргийн нуга ХХК-ийн Зөгийн бал ОРГАНИК БҮТЭЭГДЭХҮҮНИЙ ГЭРЧИЛГЭЭГ тус тус аваад байна. Түүнчлэн баталгаажуулалтын мэргэжилтнүүд нь (IFOAM)-ны итгэмжлэлийн байгууллага (IOAS)-аар Олон улсын байгууллагаар итгэмжлүүлэх ажлын хэсэгт ажилласан амжилтаар Шинийг санаачлагч Шилдэг номинаци шагналын эзэн боллоо.
Энэ үеэр хөдөлмөр, зүтгэлээрээ бусдыгаа манлайлан ажилласан албан хаагчдыг шагнаж, урамшууллаа. Хүндрэл, бэрхшээлд шантралгүй, өргөсөн тангарагтаа үнэнч байдаг нийт албан хаагчид та бүхэндээ баяр хүргэж, цаашдын ажил, амьдралд нь сайн сайхан бүхнийг хүсье.
