Орон нутгийн стандарт, хэмжил зүйн салбарын хөгжилд хувь нэмрээ оруулсан эрхмүүдийг Монгол Улсын Шадар сайдын 2021 оны 07 дугаар сарын 09-ны өдрийн тушаалаар Стандарт, хэмжил зүйн тэргүүний ажилтан цол, тэмдэгээр шагнасныг Стандарт, хэмжил зүйн газрын дарга Б.Билгүүн гардууллаа. 

Салбарын шагналын эзэд болсон Дорнод аймгийн Стандарт, хэмжил зүйн хэлтсийн дарга Н.Энхболд, Дорноговь аймгийн Стандарт, хэмжил зүйн хэлтсийн дарга Н.Баяр, Хэнтий аймгийн Стандарт, хэмжил зүйн хэлтсийн дарга Ч.Пүрэвдорж нар нь аймаг, орон нутагтаа стандарт, хэмжил зүй, тохирлын үнэлгээ, сорьцын хяналтын үйл ажиллагааг хөгжүүлж 2019, 2020 онуудад Стандарт, хэмжил зүйн хэлтсийг шинэ байртай болгох, эталон тоног төхөөрөмжийг шинэчлэх ажлуудыг удирдан зохион байгуулж хэрэгжүүлсэн байна.

Тухайлбал Дорнод аймгийн Стандарт, хэмжил зүйн хэлтэс нь анх 1977 онд БНМАУ-ын Сайд нарын зөвлөлийн дэргэдэх Үнэ Стандартын Улсын Хорооны 11 тоот тогтоолоор Чойбалсан хот дахь Чанар хэмжүүрийн хяналтын салбар нэртэйгээр байгуулагдсан ба 44 жилийн дараа шинэ, орчин үеийн чанар, стандартын шаардлага хангасан байрыг 2020 онд ашиглалтад оруулсан бол Хэнтий аймгийн тухайд шинэ байрыг 2019 онд ашиглалтад оруулж байлаа. Дорноговь аймгийн Стандарт, хэмжил зүйн хэлтсийн хувьд аймгийн хэмжээнд үйл ажиллагаа явуулж байгаа иргэн, аж ахуйн нэгжид хэмжил зүй, стандартын мэдээлэл лавлагаа, тохирлын үнэлгээний үйлчилгээг ил тод, нээлттэй хүргэж үйл ажиллагаагаараа орон нутгийн салбаруудыг манлайлан ажилласан байна.

Стандарт, хэмжил зүйн газар нь орон нутгийн 20 хэлтэсээр дамжуулан Монгол Улсын хэмжээнд үйлчилгээ үзүүлдэг Засгийн газрын тохируулагч агентлаг бөгөөд стандартчилал, хэмжил зүй, тохирлын үнэлгээ болон сорьцын хяналтын үйл ажиллагааг иргэд, үйлчлүүлэгчид шуурхай хүргэхэд удирдлагын манлайлал, баг, хамт олны санал, санаачлага, хандлага чухал болохыг шагнал гардуулах үеэр Стандарт, хэмжил зүйн газрын дарга Б.Билгүүн онцолж  цаашдын ажилд нь амжилт хүслээ.