Стандарт, хэмжил зүйн газрын дарга Б.Билгүүн “Монголын худалдааг дэмжих –EU- TRAM” төслийн багийн ахлагч хатагтай Кармен Фратитаг 2021 оны 6 дугаар сарын 21-ний өдөр хүлээн авч уулзлаа. Уулзалтад Тамгын газрын дарга Б.Эрдэнэзул, Бүтээгдэхүүн, тогтолцооны баталгаажуулалтын газрын дарга Г.Ганзориг нар оролцов.
Уулзалтын үеэр СХЗГ-ын дарга Европын холбоо нь Монгол Улстай стандартчилал, тохирлын үнэлгээний чиглэлээр олон жил амжилттай хамтран ажиллаж байгаа. Энэхүү хамтын ажиллагааны үр дүн бодитой, тогтвортой байдаг бөгөөд салбарын хөгжлийн бодлогод чухал байр суурь эзэлдэг болохыг; 2017-2021 онд хэрэгжсэн “Монголын худалдааг дэмжих –EU- TRAM” төсөл нь олон улсын стандартчиллын баримт бичгийг орчуулах, тэдгээрийг нутагшуулах; стандартчилал, баталгаажуулалтын байгууллагын хүний нөөцийг чадавхижуулах; “Дэлхийн чанарын өдөр”, “Европын худалдааны өдөр”, “Дэлхийн стандартын өдөр”-ийн үеэр чанар, стандартын талаарх бүх нийтийн мэдлэг ойлголтыг нэмэгдүүлэх, шилдэг экспортлогчдыг алдаршуулах, тэдний тэргүүн туршлагыг түгээхэд дэмжлэг үзүүлэн хамтран ажилласныг онцлоод төслийн үр өгөөжийг стандартчилал, тохирлын үнэлгээний бүх оролцогч талуудад хүргэхийн төлөө, үндэсний бараа бүтээгдэхүүний экспортын чадавхийг нэмэгдүүлэхийн төлөө ажиллах болно гэв.