Худалдаан дахь техникийн саад тотгорыг бууруулах нэг хүчин зүйл нь бүтээгдэхүүний чанар, сорилтын, хэмжлийн үр дүнг улс орнууд харилцан хүлээн зөвшөөрөх явдал юм. Үүний тулд А ба В улсын шалгалт тохируулгын эсвэл сорилтын лабораторийн үр дүнгийн ижил тэнцүү байдлыг урьдчилан нотолсон байх шаардлагтай. Эквивалент байдлыг тодорхойлох үндсэн шалгуур нь лабораторийн шалгалт тохируулга ба хэмжлийн чадавхи буюу олон улсын нэршлээр СМС (calibration and measurement capability) бөгөөд тухайн улсын хэмжил зүйн хүрээлэн тодорхой хэмжлийн төрлөөр СМС–ээ үнэлүүлэн CIPM (Олон улсын жин хэмжүүрийн хорооны) түлхүүр харьцуулалтын өгөгдлийн санд байршуулсан тохиолдолд тухайн улсад хийсэн хэмжлийн үр дүнг олон улсад хүлээн зөвшөөрнө.
Хэмжил зүйн хүрээлэнгийн уртын эталоны лаборатори нь төгсгөлт уртын хэмжүүрийн шалгалт тохируулгын төрлөөр 2018 онд Үндэсний Итгэмжлэлийн байгууллагаар (MNAS) итгэмжлүүлсэн. 2019 онд Aзи Номхон далайн хэмжил зүйн хөтөлбөр APMP-ийн хосолсон харьцуулалтад 0.5 – 100 мм хэмжих хязгаарт БНХАУ-ын хэмжил зүйн хүрээлэнтэй амжилттай хамтран оролцсон билээ. Үндэсний Итгэмжлэлийн төвийн ээлжит магадлан итгэмжлэлийг 2021 оны 9-р сарын 13-14 –ны өдрүүдэд уртын эталоны лабораторид APMP–ийн техникийн ижил түвшний үнэлгээтэй хамтран зохион байгууллаа. Ижил түвшний үнэлгээг онлайнаар явуулсан ба техникийн шинжээчээр АРМР-д хүлээн зөвшөөрөгдсөн, БНСУ-ын судлаач Дк. Чу-Шик Кан, тэргүүлэх шинжээчээр MNAS-ийн ахлах мэргэжилтэн Д.Оюунчимэг нар тус тус ажиллалаа.
Ижил түвшний үнэлгээний үеэр лабораторид хэмжил зүйн нэгж дамжуулалт, ажилтны мэдлэг, ур чадвар, шалгалт тохируулгын аргачлал, хэмжлийн эргэлзээний тооцоололыг шалгаж, СМС-н тооцоолол нь олон улсын харьцуулалтад оролцсон үр дүнтэй нийцсэн ба ISO/IEC 17025-2017 стандартын дагуу чанарын менежментийн тогтолцоо хангалттай сайн гэж дүгнэсэн.
Уртын лаборатори нь төгсгөлт уртын хэмжүүрийн шалгалт тохируулгын төрлөөр шалгалт тохируулга, хэмжлийн чадавхаа үнэлүүлж, бүртгүүлэх хүлээн зөвшөөрүүлэхэд энэхүү үнэлгээний тайлан чухал алхам болсон. Цаашид бид энэхүү үнэлгээний тайлан, СМС тооцоолол зэргийг олон улсын болон бүс нутгийн хэмжи зүйн байгууллагаар хянуулан баталгаажуулснаар BIPM CIPM-ийн өгөгдлийн мэдээллийн санд байршуулна. Ингэснээр үйлдвэрлэл, бүтээгдэхүүний чанар хангалт, итгэмжлэлийн үйл ажиллагааг дэмжихэд, худалдаан дахь техникийн саадыг арилгахад хэмжил зүйн талаас жинтэй хувь нэмэр болно. Техникийн саадаас үүсэлтэй үргүй зардлын өсөлт, бараа таваар саатах, олон дахин шалгах явцыг багасгах ач холбогдолтой юм.