СХЗГ-ын Захиргаа,удирдлагын газрын дарга Б.Ууганбаяраар ахлуулсан ажлын хэсэг Завхан аймгийн СХЗХ-ийн ажил байдалтай танилцлаа.
Тэрээр энэ үеэр Завхан аймгийн хэлтсийн үйл ажиллагааг зөвлөн тусалж, тодорхой асуудлаар ажил сайжруулах үүрэг чиглэл өгөв. Түүнчлэн тус аймгийн Засаг дарга Д.Түвшинжаргалтай уулзаж, СХЗХ-ын тоног төхөөрөмжийг нэмэгдүүлж, үйл ажиллагааг өргөжүүлэх талаар санал солилцсон. Үүний үр дүнд өдгөө шаардлагатай байгаа эталоны тоног төхөөрөмжийн санхүүгийн асуудлыг шийдвэрлэх боломжтой гэдгээ Засаг дарга Д.Түвшинжаргал илэрхийлж, шаардлагатай судалгаа, мэдээллийг танилцуулахаар болов.
Тус хэлстийн хувьд багаж тоног төхөөрөмж дутагдалтай ч баруун бүсийн аймгууд дундаа хамгийн анх олон улсын ISO стандартуудыг үйл ажиллагаандаа нэвтрүүлсэн бөгөөд шинээр баталсан болон шинэчилсэн стандартуудыг орон нутгийнхаа бүхий л аж ахуйн нэгжүүдэд цаг тухайд нь хүргүүлж, сургалт явуулснаар үйл ажиллагаандаа тусгадаг болсон талаар тус хэлтсийн дарга Г.Цэцэгээ хэлсэн. Мөн тэрээр “Энэ байгууллагын үйл ажиллагааг зөвхөн жин хэмжүүрээр л ойлгодог байсан бол манайд хандаж байгаа байгууллагуудад эхлээд стандартыг нь судлуулдаг болсноор хандлага сайжирсан” гэдгийг хэлсэн юм.
Ажлын хэсэг Агентлагийн даргын баталсан удирдамжийн хүрээнд Завхан аймгийн Стандарт, хэмжил зүйн хэлтсийн даргын ажлыг хүлээлцэн шинээр томилогдсон дарга Н.Баярмаад Стандарт, хэмжил зүйн газрын бодлого, зорилт, цаашид хэрэгжүүлэх арга хэмжээний талаар чиглэл өгч ажлын амжилт хүсэхийн зэрэгцээ тэтгэвэр тогтоолгох насанд хүрч төрийн албанаас чөлөөлөгдөж буй Г.Цэцэгээ даргад хүндэтгэл үзүүлж эрүүл энх сайн сайхныг хүсэв.